यो चुरोटको विज्ञापन होइन
~सरस्वती प्रतीक्षा
जसरी सम्हालेर राख्छन् मान्छेहरुले
गुलाफका फूलहरु/प्रेमपत्रहरु
सिनेमाका टिकटहरु/क्याडवरीका खोलहरु/सँगै खिचिएका तस्बिरहरु
त्यसरी नै अतिशय प्रेमले
सम्हालेर राखेकी छु मैले केही थान चुरोटका ठुटाहरु !
दिल खोलेर हाँस्न जोसँग पनि सकिन्छ
पूरै दिल खोलेर रुन खास मान्छेसँग मात्र सकिन्छ
म कसरी बिर्सन सक्छु–
पहिलोपटक मेरो एउटा हात समातेर भित्रैबाट ऊ रुँदा
उसको अर्को हातमा चुरोट थियो
सँगै ब्ल्याक टी पिउँदा
ब्ल्याक लेबलको रक्सीले भन्दा बढी नशा लागेपछि
वेटरलाई चियाको मूल्यभन्दा दोब्बर टिप्स दिएका थियौं
त्यहीबखत पहिलोपटक उसको एउटा हातले
मेरा केशराशीहरुको लम्बाइ नाप्दै गर्दा
उसको अर्को हातमा चुरोट थियो
धुम्रपानविरोधी एउटी स्वास्नीमान्छे
आजकल उसले छोडिगएका चुरोटका ठुटाहरु देख्दैमा तरंगित हुन्छु
मानौं,
चुरोटका ठुटाहरु चुरोटका ठुटाहरु होइनन्
उसको स्पर्शको चास्नीमा डुबाइएका प्रेमग्रन्थहरु हुन्
मान्छेहरु प्रेमको साक्षी
मन्दिर वा गुम्बा बनाउँछन्, रुख वा नदीनाला बनाउँछन्
उड्दै गरेको चुरोटको धुवाँलाई साक्षी राखेर ऊ भन्छ,
–‘तँ किताब ! आइज म तँलाई पढ्छु
तँलाई शब्दमा मात्र होइन
शब्द–शब्द बीचको ग्याप र ग्यापको सुक्ष्मतामा पढ्छु ।’
झगडा, घुर्की, समर्पण, प्यासन
सबै भाव र रंगहरुको सिंगो प्याकेज ऊ
त्यही प्याकेजको लयसँग लय मिलाउँदाका साक्षी चुरोटका ठुटाहरु
एउटा अपत्यारिलो सत्यका साक्षी चुरोटका ठुटाहरु
कतिसम्म निख्खर हुनसक्छ प्रेम
र तिख्खर हुनसक्छ प्रेमको स्वाद ?
तमाम तत्वबोधका साक्षी चुरोटका ठुटाहरु
माफ गर्नुहोला
चुरोटको कुनै अमूक मल्टिनेशनल कम्पनीको विज्ञापन होइन यो
अहँ, यो चुरोटको विज्ञापन होइन !
साभार :
कोई टिप्पणी नहीं:
एक टिप्पणी भेजें